Die begrip ekumeniese eenheid gee, sowel vanweë die historiese fundering as die bekendheid daarvan in die Gereformeerde ekumene, die beste uitdrukking aan een kerkverband. Dié term veronderstel dus die realisering van een kerkverband deur erkenning van attestate, kanselruil en beroepingsmoontlikhede oor en weer. In dié term word byvoorbeeld die begrip van Sister Church Relationship, sowel as dié van Churches in Ecclesiastical Fellowship geakkommodeer.

Die begrip ekumeniese bande wat reeds in die IKGK geyk is en dus deur verskeie kerkgemeenskappe in die Gereformeerde ekumene gebruik word, gee uitdrukking aan sowel die verhouding tussen kerkgemeenskappe waar voorbereidende gesprekke plaasvind met die oog op een kerkverband as die verhouding van kerkgemeenskappe wat verskillende (Gereformeerde) belydenisse onderskryf en tog ‘n gelyksoortige leer, diens en tug onderhou, soos dit byvoorbeeld in die nuut gestigte Konvent van Reformatoriese Kerke in Suider-Afrika tot uitdrukking kom.

Die begrip ekumeniese kontak kan gebruik word om die ekumeniese verhouding met kerke uit te druk met wie die GKSA in dieselfde ekumeniese vergaderings sit, sonder dat noodwendig ekumeniese eenheid, of ekumeniese bande, onderhou word – soos in die ICRC (IKGK), die REC en NAPARC. Die term ekumeniese kontak druk ook die verhouding tussen kerkgemeenskappe uit wat gesamentlike take in dieselfde gemeenskap onderneem, sonder dat noodwendig ekumeniese bande of ekumeniese eenheid veronderstel word. 

Kerke waarmee die GKSA Ekumeniese EENHEID beleef